وفاقی وزیر توانائی سردار اویس احمد خان لغاری نے کہا ہے کہ ملک میں توانائی کے متبادل ذرائع کا حصہ بڑھ رہا ہے اور وہ کم لاگت بھی ہیں۔ پاکستان کے توانائی کے شعبے کے لیے پہلی بار طویل المدتی پالیسی بنائی جا رہی ہے۔
ان خیالات کا اظہار انہوں نے پاکستان بزنس کونسل کے زیر اہتمام منعقدہ سیمینار سے خطاب کرتے ہوئے کیا۔
وفاقی وزیر نے کہا کہ قومی معیشت مضبوط ہو رہی ہے، حکومت عوام کو ریلیف دینے کی ہر ممکن کوشش کر رہی ہے۔ انہوں نے مزید کہا کہ نیٹ میٹرنگ کے نظام میں بہتری کی ضرورت ہے، اور معیشت کی بہتری کے لیے مشکل فیصلے کرنے پڑے۔ انہوں نے کہا کہ تقسیم کار کمپنیوں کی کارکردگی کو بہتر بنایا جا رہا ہے اور توانائی کے شعبے میں بڑی اصلاحات کی گئی ہیں۔
ان کا مزید کہنا تھا کہ حکومت گرین انرجی پر کام کر رہی ہے، پاکستان میں صاف توانائی کے فروغ کے لیے اقدامات کیے جا رہے ہیں۔ انہوں نے مزید کہا کہ ملک میں توانائی کے شعبے میں وسیع مواقع موجود ہیں اور پہلی بار جامع منصوبہ بندی کے ساتھ اصلاحات نافذ کی گئی ہیں۔ وزیر نے کہا کہ توانائی کے شعبے میں نجکاری بھی ان اصلاحات کا حصہ ہے۔
