چیئرمین فیڈرل بورڈ آف ریونیو (ایف بی آر) راشد محمود لنگڑیال نے کہا ہے کہ وزیراعظم شہباز شریف نے تنخواہ دار طبقے کے لیے ٹیکس کی شرح میں کمی کی ہدایت کی ہے۔
اسلام آباد میں پاکستان بزنس کونسل کے سیمینار سے خطاب کرتے ہوئے ایف بی آر کے چیئرمین راشد محمود لنگڑیال نے کہا کہ وزیراعظم کی ہدایات پر عمل کرتے ہوئے آئندہ مالی سال کے بجٹ میں تنخواہ دار طبقے کو ٹیکس ریلیف دینے کے لیے باقاعدہ کام شروع کر دیا گیا ہے۔
انہوں نے مزید کہا کہ وزیراعظم نے بڑی کمپنیوں پر عائد سپر ٹیکس میں کمی کی بھی ہدایت کی ہے اور اس فیصلے پر عملدرآمد کے لیے حکومتی سطح پر مشاورت شروع کر دی گئی ہے۔
لنگڑیال نے کہا کہ وفاقی حکومت آنے والے مراحل میں بڑی کمپنیوں اور کاروباروں پر عائد سپر ٹیکس کو بتدریج کم کرنے اور بالآخر ختم کرنے کے لیے تیار ہے۔
انہوں نے مزید کہا کہ سپر ٹیکس میں ممکنہ کمی اور خاتمے کے حوالے سے انٹرنیشنل مانیٹری فنڈ (آئی ایم ایف) سے بھی بات چیت کی جائے گی کیونکہ اس کے خاتمے کا مقصد ملک میں سرمایہ کاری کو فروغ دینا ہے۔
چیئرمین ایف بی آر نے واضح کیا کہ ٹیکس کی شرح میں کسی بھی قسم کی کمی کا براہ راست انحصار ٹیکس کی بہتر تعمیل اور ٹیکس دہندگان کی تعداد میں اضافے پر ہوگا۔ جتنے زیادہ لوگ ٹیکس ادا کرتے ہیں، ٹیکس کی شرح کم کرنے کی گنجائش اتنی ہی زیادہ ہوتی ہے۔
