لاہور میں ٹریفک پولیس منگل کو شہر کے علاقے نوان کوٹ میں ٹریفک قوانین کی خلاف ورزی کرنے پر ایک شخص کو پکڑنے میں کامیاب ہوگئی جس کے پاس اپنی گاڑی کے خلاف 166 ای چالان درج تھے۔

پولیس کا کہنا تھا کہ پوچھ گچھ کے بعد اس شخص کو جانے دیا گیا لیکن اس کی گاڑی کے کاغذات ضبط کر لیے گئے۔


اس شخص نے 142 بار ٹریفک سگنل توڑا، اسے 12 بار غلط طریقے سے لین تبدیل کرنے کے لیے ٹکٹ جاری کیا گیا، اور متعدد بار اسٹاپ لائن کے اصول کی خلاف ورزی بھی کی۔ اس کے نتیجے میں، اس پر 80,400 روپے کا جرمانہ عائد کیا گیا، ٹریفک پولیس نے کہا کہ اس کے کاغذات صرف اس وقت واپس کیے جائیں گے جب وہ جرمانہ ادا کرے گا۔

لاہور ٹریفک پولیس نے ٹوئٹر پر شہریوں کو آگاہ کیا کہ اگر وہ یہ جاننا چاہتے ہیں کہ ان کی گاڑیوں کے خلاف کتنے ای چالان درج ہوئے ہیں تو وہ اپنی گاڑی کا چیسس نمبر بذریعہ ایس ایم ایس 8815 پر بھیج سکتے ہیں۔

ای چالان کیا ہے؟
پنجاب انفارمیشن ٹیکنالوجی بورڈ (پی آئی ٹی بی) کی ویب سائٹ کے مطابق، ای چالان ٹریفک کی خلاف ورزی کی اطلاع دینے کا نظام ہے۔ یہ ایک اینڈرائیڈ پر مبنی موبائل ایپلی کیشن ہے جو ٹریفک پولیس کو ٹریفک قوانین کی خلاف ورزی کرنے والے شخص کے لائسنس کی حیثیت کی تصدیق کرنے میں مدد کرتی ہے۔ یہ نظام ٹریفک پولیس کو موقع پر ہی گاڑی چلانے والوں کو ٹریفک کی خلاف ورزی کے ٹکٹ جاری کرنے کی بھی اجازت دیتا ہے۔