ہانیہ عامر اپنی شاندار اداکاری کی وجہ سے جانی جاتی ہیں، تاہم اب انہیں پاکستان میں خواتین کے لیے اہم کردار ادا کرنے کا موقع دیا گیا ہے، کیونکہ اقوام متحدہ نے انہیں پاکستان کے لیے یو این ویمن کی خیر سگالی سفیر مقرر کیا ہے۔
انسٹاگرام پر شیئر کیے گئے ایک بیان میں یو این ویمن پاکستان نے ہانیہ عامر کو اپنی نئی خیر سگالی سفیر کے طور پر خوش آمدید کہا۔ بیان میں کہا گیا ہے کہ معروف اداکارہ اپنے پلیٹ فارم کا استعمال پاکستان بھر کی خواتین اور لڑکیوں کی آواز کو بلند کرنے، بیداری پیدا کرنے اور بااختیار بنانے کی ترغیب دینے کے لیے کریں گی۔
اس میں مزید کہا گیا کہ مل کر، وہ ایک ایسے مستقبل کی تعمیر کرنا چاہتے ہیں جہاں ہر عورت اور لڑکی تشدد، امتیازی سلوک اور عدم مساوات سے آزاد زندگی گزار سکیں، اور اپنی پوری صلاحیتوں کا ادراک کر سکیں۔
ہانیہ عامر یہ اعزاز حاصل کرنے والی دوسری پاکستانی ہیں، منیبہ مزاری کے بعد، جنہیں 2015 میں یو این ویمن کی خیر سگالی سفیر مقرر کیا گیا تھا۔ جنوبی ایشیا میں ہانیہ یہ اعزاز حاصل کرنے والی تیسری خاتون اور مجموعی طور پر چوتھی شخصیت بن گئی، منیبہ مزاری، بھارتی ٹینس سٹار ثانیہ مرزا، اور بالی ووڈ فلمساز و اداکار فرحان اختر کے ساتھ ہانیہ عامر یہ اعزاز حاصل کر رہی ہیں۔
عالمی سطح پر، ایما واٹسن، نکول کڈمین، اور این ہیتھ وے جیسے ہالی ووڈ ستارے بھی اقوام متحدہ کی خواتین کی خیر سگالی سفیر کے طور پر خدمات انجام دے چکے ہیں۔
