پاکستان نے ایک سنسنی خیز مقابلے کے بعد ایشیا کپ رائزنگ اسٹارز کا ٹائٹل اپنے نام کر لیا جو سپر اوور میں ختم ہوا، جہاں ٹیم نے شاندار بیٹنگ اور باؤلنگ کا مظاہرہ کرتے ہوئے بنگلہ دیش کو شکست دی۔
دوحہ میں کھیلے گئے فائنل میں بنگلہ دیش اے نے ٹاس جیت کر پاکستان شاہینز کو پہلے بیٹنگ کی دعوت دی تو پاکستانی بلے بازوں کو کارکردگی دکھانے میں مشکلات کا سامنا کرنا پڑا۔
پاکستان شاہینز نے اپنی پہلی دو وکٹیں صرف دو رنز پر گنوا دیں۔ اوپنر یاسر خان اور ون ڈاؤن بلے باز محمد فائق بغیر کوئی رن بنائے آؤٹ ہوئے جس سے ٹیم دباؤ میں آگئی۔
پورے ٹورنامنٹ میں شاندار کارکردگی کا مظاہرہ کرنے والے معاذ صداقت نے 18 گیندوں پر دو چوکوں اور ایک چھکے کی مدد سے 23 رنز بنائے۔ عرفات منہاس نے 25 جبکہ کپتان عرفان خان نیازی صرف 9 رنز بنا سکے۔
پاکستان شاہینز کی جانب سے سعد مسعود نے 26 گیندوں پر 3 چوکوں اور 3 چھکوں کی مدد سے سب سے زیادہ 38 رنز بنائے جس سے ٹیم کو مقررہ اوورز میں 9 وکٹوں پر 125 رنز بنانے میں مدد ملی۔
بنگلہ دیش اے کے رپن منڈل نے تین اور رقیب الحسن نے دو وکٹیں حاصل کیں۔
رن کے تعاقب کے دوران بنگلہ دیش بھی جلد لڑکھڑا گیا اور 44 رنز پر 4 وکٹیں گنوا دیں۔ اوپنر حبیب الرحمان سوہن نے سب سے زیادہ 26 رنز بنائے۔
ایس ایم مہروب نے 19 اور رقیب الحسن نے 24 رنز بنائے، جس سے بنگلہ دیش کو امید ملی، لیکن پاکستان نے دوبارہ کنٹرول حاصل کر لیا۔ تاہم بنگلہ دیش کی آخری وکٹ کی جوڑی نے میچ کو ٹائی پر لے کر سب کو حیران کر دیا۔
عبدالغفار ثقلین اور رپن منڈل نے بالترتیب 16 اور 11 رنز بنا کر بنگلہ دیش کو 20 اوورز میں 9 وکٹوں پر 125 رنز تک پہنچا کر اسکور برابر کردیا۔
اگرچہ احمد دانیال نے آخری اوور میں اچھی بولنگ کی لیکن ثقلین نے میچ کو سپر اوور میں دھکیلتے ہوئے اسکور برابر کرنے میں کامیاب رہے۔
بنگلہ دیش نے سپر اوور میں پہلے بیٹنگ کرتے ہوئے 2 وکٹوں پر صرف 6 رنز بنائے۔ احمد دانیال نے اپنی شاندار فارم کو جاری رکھتے ہوئے دونوں وکٹیں حاصل کیں۔
پاکستان کے لیے، سعد مسعود اور معاذ صداقت سپر اوور میں بیٹنگ کے لیے آئے اور ہدف کا تعاقب باآسانی کرتے ہوئے پانچویں گیند پر بغیر کوئی وکٹ کھوئے 8 رنز بنا کر پاکستان کا تیسرا ایشیا کپ رائزنگ اسٹارز کا ٹائٹل اپنے نام کیا۔
پاکستان شاہینز نے اس سے قبل 2019 اور 2023 میں ایشیا کپ رائزنگ اسٹارز جیتا تھا۔
فائنل میچ کے دوران اے سی سی کے صدر اور پی سی بی کے چیئرمین محسن نقوی سٹیڈیم میں موجود تھے۔
